На 3 јули, во Кинотеката започнува специјална филмска програма во чест на 75 години од основањето на Друштвото на филмски работници на Македонија (ДФРМ). До 18 јули, со почеток во 20 часот, публиката ќе може да погледне играни и документарни класици, анимирани филмови и современи остварувања.
„Јубилејната филмска ревија претставува потсетување на 75 години активна работа на Друштвото на филмски работници на Македонија и почит кон сите генерации визионери, филмски автори, актери, филмски работници и соработници кои низ сите овие години ја граделе и сѐ уште ја градат македонската кинематографија“, кажа Игор Иванов-Изи, претседател на ДФРМ.
Програмата ќе биде отворена со два филма на Столе Попов: документарецот „Дае“ (1979) и култниот „Тетовирање“ (1991), првиот македонски филм кандидиран за Оскар.
Во следните денови, публиката ќе може да ги проследи: „Денес треба нешто да се случи“ (1978) и „Црно семе“ (1971) на 4 јули, „Една“ (2019) на 10 јули, „Јас Блага Мицанова“(1977) и „Господ постои, името ѝ е Петрунија“ (2019) на 11 јули, „Оган“ (1974) и „Исцелител“ (2017) на 17 јули и „Бубачки“ (2004) и „Медена земја“ (2019) на 18 јули.
Сите проекции се бесплатни.
