Денеска (24 септември) од 18 часот, во кафе барот „Котур“ во Скопје ќе се одржи слушачка промоција на вториот албум на скопскиот бенд „Карла Левински“, насловен „Нова зграда“, издание на „Шарла рекордс“.
„Карла Левински“ е проект на гитаристот Сеад Хаџиќ-Сецко („Ласт експедишн“, „Мугер фугер“), а првиот албум го објави лани. Од „Шарла“ велат дека бескомпромисен став, сиров панк звук и анархистички текстови остануваат главната движечка сила и на новиот материјал.
Во реализацијата на албумот учествуваа и Огнен Мангаровски-Оки, Виктор Гајтановски, Сашо Митревски, Андреј Атастасов Даскаловски-Еди, Андреја Салпе, Андреј Коларовски и Стефан Момиќ. Албумот е снимен во домашното студио на Хаџиќ, миксот го направи Горан Трајкоски-Готра, а дизајнот на омотот е на Даниела Хаџиќ.
