Хелена Бонам Картер е првото големо име кое се најавува за четвртата сезона на „Белиот лотус“. Холивудските медиуми објавија дека британската актерка е во преговори за една од главните улоги, откако претседателот на Ејч-Би-О, Кејси Блојс, потврди минатиот месец дека започнало избирањето на актерите за четвртата сезона на една од нивните најпопуларни серии.
Познато е дека новата сезона ќе се одвива во Франција, а снимањето треба да почне напролет.
Претходните сезони беа сместени на Хаваи, Сицилија и во Тајланд и секоја имаше различна актерска екипа, со мали исклучоци.
Последната значајна телевизиска улога на Бонам Картер беше на принцезата Маргарет во третата и четвртата сезона на „Круна“.
(Фото: Гети)
