Петтата сезона на хумористично-криминалистичката серија „Само убиствата во зградата“ ќе има премиера на 9 септември, објави стриминг сервисот „Хулу“. Тогаш ќе бидат емитувани првите три епизоди, а следните ќе одат еднаш неделно.
Откако нивниот сакан портир Лестер умира под сомнителни околности на крајот на четвртата сезона, Чарлс, Оливер и Мејбл одбиваат да веруваат дека станува збор за несреќа. Нивната истрага ги носи во мрачните агли на Њујорк и пошироко, каде што откриваат опасна мрежа од тајни, што поврзува моќни милијардери, мафијаши од старата школа и мистериозни жители на „Арконија“.
Покрај стандардната актерска екипа Стив Мартин, Мартин Шорт, Селена Гомез, Мерил Стрип и Давајн Џој Рендолф, нови имиња во петтата сезона се Боби Канавале, Рене Зелвегер, Кристоф Валц, Дајана Вист, Теа Леони и Киган-Мајкл Ки.
„Само убиствата во зградата“ имаше премиера во август 2021 и досега доби бројни номинации за Еми и Златен глобус.
