Амбасадата на Полска во Македонија минатиот месец донираше пакети со повеќе од 50 книги од полски автори преведени на македонски јазик на 13 библиотеки низ целата држава, рече денеска Јоланда Гжелчик, сопругата на амбасадорот Кшиштоф Гжелчик.
На настанот во Културно информативниот центар (КИЦ) во Скопје беше презентирана полската култура, во организација на Амбасадата и Македонскиот центар „Добредојде“.
„Мај беше месец на полската литература во библиотеките во Северна Македонија. Тоа беше дел од проектот ‘Полска полица – полска литература во македонските бибиотеки’. Сега македонските читатели ќе можат да читаат полски автори во Скопје, Охрид, Битола, Тетово, Штип, Струмица, Гевгелија, Прилеп и Виница. Книгите исто така се достапни на Катедрата за словенски јазици на Филолошкиот факултет. Многу сме среќни што полската литература е доста читана кај македонските читатели“, рече Јоланда Гжелчик.
Во КИЦ е поставена и изложба на дела од конкурсот „Графика на годината“, кој беше организиран од Графичкиот факултет на Академијата за ликовни уметности „Јан Матејко“ во Краков.
Фото: Полскиот амбасадор Кшиштоф Гжелчик и сопругата Јоланда
