Џорџ Лукас, милијардерот и режисер кој стои зад франшизи како „Војна на ѕвездите“ и „Индијана Џонс“, објави дека неговиот Музеј на наративна уметност во Лос Анџелес ќе се отвори во септември 2026, осум години откако почна да се гради. Музејот ќе содржи илјадници уметнички дела и архивски предмети од филмската кариера на Лукас.
Според „Лос Анџелес тајмс“, изградбата на музејот чинела една милијарда долари и била финансирана од Лукас. Тоа ги вклучува трошоците за изградба, неговата уметничка колекција и фонд од најмалку 400 милиони долари.
Музејот ќе се отвори на 22 септември 2026, повеќе од една деценија откако Лукас првпат ја претстави идејата за неговата изградба. Тој ќе зафаќа 30.000 квадратни метри и ќе има повеќе од 40.000 дела во својата постојана колекција.
Во 35-те галерии ќе бидат сместени и костими, реквизити, концептуална уметност и разни предмети од филмовите на Лукас.
Музејот има футуристички дизајн и често се споредува со вселенски брод. Архитектот Куш Парек, кој работел на проектот, изјави дека дизајнот е инспириран од митски и филмски пејзажи и ги води посетителите на патување низ вселената.
