Гласот од хит-филмот „Петтиот елемент“, познатата албанска оперска пејачка Инва Мула, одржа одличен концерт вчера (28 ноември) во Националната опера и балет. Мула настапи заедно со сопранот Дешира Амети-Крлиу, тенорот Исмет Весели и со оркестарот на Операта, со кој диригираше Иван Еминовиќ. Настанот го режираше Дејан Прошев.
Грациозна на сцената и беспрекорна во изведбите, Мула ја освои публиката со своите настап и харизма. Двете сопранистки и тенорот пееја популарни арии од „Травијата“, „Ла Боем“, „Кармен“ и други оперски бисери од Верди, Пучини, Бизе, Офенбах и други познати автори.
Мула и Амети-Крлиу при крајот настапија во дует и му посветија песна на поп-пејачот Шпат Касапи, кој почина на 26 ноември. Публиката на нозе и со силни аплаузи на крајот ги испрати тројцата пејачи.
Инва Мула ја стекна интернационалната слава со култниот филм „Петтиот елемент“ на Лик Бесон, каде што го позајмува гласот на мистичната Дива. Таа има блескава меѓународна кариера и настапувала на најпрестижните сцени низ светот, толкувајќи ги главните улоги во врвните оперски дела.
М. ЏАРОВСКА
