Австриската влада и националниот радиодифузер ОРФ се најдоа во проблеми каде да се одржи следната Евровизија и како да ги покријат трошоците, изјавија официјални лица, откако 24-годишниот Џеј Џеј ѝ ја донесе третата победа на Австрија со песната „Потрошена љубов“. Паралелно со прославата на победата, најголемиот дел од јавната расправа во Австрија денес е за цената на организацијата на настанот, која се проценува на десетици милиони евра.
Финалето на Евровизија во Базел се одржа неколку дена откако новата коалициска влада на Австрија го претстави следниот национален буџет, во кој доминираат мерки на штедење, додека земјата влегува во третата година на рецесија.
Запрашан како ќе се покријат трошоците за организација, шефот на ОРФ Роланд Вајсман одговори:
„Доколку имав совршен одговор денеска, тоа ќе беше малку како вештерство. Но, откако во деновите пред финалето стана јасно дека имаме шанси да победиме, почнавме да размислуваме за тоа. Ние сме во интензивни разговори со австриските власти“.
Тој додаде дека ќе има „транспарентен процес“ за избор на градот-домаќин на натпреварувањето. Виена беше домаќин пред десет години по победата на Кончита Вурст, но Вајсман кажа дека и други места пројавиле интерес.
Џеј Џеј, чие вистинско име е Јоханес Пич, кажа дека би сакал настанот да се одржи во Виена, неговиот роден град. Тој исто така му рекол на ОРФ дека би сакал да биде водител.
(Фото: АП)
