Бриџит Џонс, лик создаден од писателката Хелен Филдинг што во четири филма го играше Рене Зелвегер, ќе добие бронзена статуа во централен Лондон. Таа ќе биде откриена на 17 ноември, придружувајќи се на други легендарни филмски ликови на плоштадот Лестер, каде што се наоѓаат четири киносали.
„Мислам дека ова е одлично зашто Бриџит е соодветна лондонска хероина и идејата таа да биде засекогаш присутна во централен Лондон е навистина возбудлива“, изјави Ерик Фелнер, копретседателот на филмското студио „Воркинг тајтл“, кое стои зад филмските адаптации.
На овој плоштад се поставени и статуи на Бетмен, Индијана Џонс, Хари Потер, Мери Попинс, Чарли Чаплин и други. Најавено е дека Зелвегер ќе присуствува на отворањето.
Првиот филм за Бриџит Џонс излезе во 2001, а четвртиот оваа година. Фелнер кажа дека Филдинг не пишува нова книга, но не би имале ништо против да снимат петти филм.
