Македонско- словенечката музичарка Жаклина Крстевска- Петек со етно групата „Калина“ често настапува во Словенија со македонски изворни песни. Крстевска е родена и живее во Љубљана, по мајка е Словенка а по татко Македонка. Сношти (29 август) таа настапи во на фестивалот Охрид фест на сцената на „Долни Сарај“ и испеа песна за нејзиното македонско потекло, во дует со Благица Павловска.
„Во 2010 ја основавме етно групата ‘Калина’ во која сме шест члена, а јас свирам мадолина. Во групата имаме и гитара, хармоника, тамбура. Пееме исклучиво македонски изворни песни, преработени, на разни настани и по разни поводи. Ние сме непрофитна организација, и сите музичари во групата сме по потекло од Македонија, а имаме и пејачка група која настапува со нас. Таму и има и Словенци, вљубеници во нашата музика“, ни рече Крстевска- Петек. Таа од мала одлично го зборува македонскиот јазик, кој го научила од татко ѝ. Музиката е нејзина љубов и хоби, а работи во приватна фирма во администрација.
„Настапуваме во просек еднаш во месецот, на македонски вечери и по повод нашите празници, но пееме и како гости на прослави на Македонците во Словенија. Проби имаме често, а репертоарот го бираме заеднички. Словенците кои пеат со нас се воодушевени од нашите песни, особено од оние побрзите. Најмногу ги бендисува песната ‘Маце, Маце’ и со радост ја пеат“, ни рече музичарката.
Песната „Потомка сум мома таткова“ која ја испејаа Жаклина Крстевска- Петек и Благица Павловска го освои третото место од публиката на фолк вечерта на Охрид фест кој и годинава беше во духот на македонската староградска и народна музика и охридскиот мелос. Првото место го освои Мишко Крстевски.
М. ЏАРОВСКА
