Дваесетгодишната Чарна Невзати ќе ја претставува Македонија на изборот за „Мис на светот” на 31 мај во Хајдерабад, Индија, соопшти сопственикот на лиценцата Шаќир Села, кој е и сопственик на модната агенција „Даман” од Истанбул.
Чарна е студентка на Правниот факултет „Јустинијан Први” на Универзитетот „Кирил и Методиј“ во Скопје, каде што освоила специјална награда за најдобар сценски настап „Бранко Ѓорчев“ и е победничка на Ораторската вечер „Иво Пухан“. Професионално се занимава со манекенство како дел од модната агенција „Макс Моделс”, со низа модни кампањи за познати домашни и светски брендови.
На изборот за „Мис на светот” ќе учествуваат 120 држави.
„Веруваме дека нашата претставничка ќе биде достојна амбасадорка на македонската убавина, култура и вредности на светската сцена и најдобро ќе ја промовира државата на светско ниво“, изјави Шаќир Села, кој минатата година за првпат по 15 години организираше избор на убавина во нашата држава.
