Главната награда „Кромид“ за најдобар долгометражен филм на 16. издание на фестивалот на креативен документарен филм „МакеДокс“ ја доби „Земја и крилја“ на Стефан Малешевиќ. Фестивалот беше затворен синоќа откако од 21 август се одржуваше под мотото „Кому му е гајле за реалноста?“.
Комисијата во состав Марк Едвардс, Џејмс Берклаз-Луис и Маргарита Арсова едногласно го награди „Земја и крилја“ за „прецизноста на избраната дистанца, измерена со извонредна грациозност, за откривањето на една невидена страна на македонското општество, за прекрасната кинематографија што се движи со тивка и маѓепсувачка намера и за изненадувачката перспектива за родовата еднаквост во една рурална заедница“. Станува збор за македонско-српска копродукција, а наградата ја прими продуцентката Ивана Шекуткоска.
Наградата „Млад кромид“ му припадна на филмот „Фиуме или смрт!“ на Игор Бежиновиќ од Хрватска, а наградата „Сечкан кромид“ за најдобар краток документарен филм ја доби „Машина за шиење“ на Уло Пиков.
„Исповед“ на Ребека Бижубова ја прими наградата „Кокарче“ за најдобар студентски филм, а Наградата за најдобри етички идеи ја доби „Ниедна друга земја“ на Басел Адра, Хамдан Балал, Јувал Абрахам и Рејчел Зар.
(Фото: Македокс)
