Дуото „2Бона“ го објави првото поглавје од новиот албум насловен „94“, за кој вели дека раскажува моќна музичка приказна за генерацијата која остави трага. Името на албумот е инспирирано од годината на раѓање на членовите Кун и Тони.
Во овој прв дел можат да се слушнат шест песни, проследени со видеозаписи: „Еверест”, „Ради реда”, „Лето”, „Еурека”, „Сука” и „Мозаик”. На дел од нив дуото соработува со Тајзи, Барбара Поповиќ и младите артисти на „Горила ТВ“, Шаро, Инсерта, Фико, Муфи и Вански.
Во снимањето учествуваа продуцентите Лазар Цветковски, Иле Спасев, Марио Јелиќ-Кун и Филип Андреев.
„Со ‘94’ сакавме да ја раскажеме нашата приказна – како растевме, од каде почнавме, што преживеавме и каде се наоѓаме денес. Овој албум не е само за нас, туку за секоја генерација која се бори да остави белег“, велат Кун и Тони.
Албумот е достапен на сите стриминг платформи.
