Осумнаесет години откако излезе песната „Опасно“, поп-пејачите Маја Саздановска и Елвир Мекиќ снимија спот за неа. Видеото беше промовирано на јутјуб каналот на „Урбан рекордс“.
„Идејата да снимиме спот за песната што ја испеавме пред скоро две децении беше на Иван Јованов-Ивајо и со Маја веднаш се сложивме. Но, бидејќи сакавме да ги вклучиме и фановите, решивме во спотот да учествуваат и тие и да ни испратат свои видеа како ја пеат ‘Опасно‘“, вели Мекиќ.
„Опасно“ е снимена во 2008 на музика на Јован Јованов и текст на Елвир Мекиќ, а Саздановска и Мекиќ велат дека и денес звучи модерно. Во спотот учествува и Јован Јованов.
Елвир Мекиќ ќе ја испее оваа песна на заедничкиот концерт со Јован Јованов, кој ќе се одржи во салата „Борис Трајковски“ на 6 јуни. Билетите за концертот се продаваат преку мрежата на Мк тикетс.
