Педесет диџеи ќе пуштаат музика на новогодишната забава на 31 декември во Младински културен центар во Скопје. Насловена „Лаврејв“ (LoVERAve), на журката ќе има пет подиуми, на кои ќе се танцува на разни стилови на електронската музика.
Најавено е дека стејџовите ќе бидат поделени на: најголеми хитови, хаус/техно, џангл/драменбејс/хип-хоп, транс/прогресив и чилаут/амбиент.
„На секоја од петте сцени настапуваат по 10 од најдобрите македонски диџеи и диџејки од постарата и поновата генерација и секој од нив носи своја приказна, која ја раскажува преку својата селекција на музика. Секоја сцена има свое темпо и магија“, најавуваат организаторите.
Меѓу најавените диџеи се Александар Малевски-Мале, Божидар Јовановиќ-Боле, Самоил Радински, Навигатор, Дарко Јорданов, Бушава Азбука, Соња Исмаил, Нино Наумов, Жани Митревски, Роботек, Дарко Степиќ, Вања, Деа Пурпуреа, Горан Путица, Александар Гавровски, Јане Алтипармаков, Дабнотик и други.
