Промоции на албуми во живо, специјално создадени музички проекти, домашни таленти и светски ѕвезди на блузот, на моменти и заедно на сцена, беа содржани во четирите распродадени вечери на шестото издание на Котон блуз фестивал во Скопје, што се одржа во рок барот „Русти“. Повторно нова локација (шеста година по ред), повторно нов концепт и повторно врвен блуз и добро расположение.
Наспроти гужвата во „Лабораториум“ лани, фестивалот овојпат се пресели во помал простор, во поклупски амбиент, во кој музиката можеби можеше и подобро да се доживее, а публиката да биде поблиска со изведувачите. Изостана вистинското фестивалско чувство, зашто „Русти“, сепак, е бар, но состојбата со достапни затворени места во Скопје е очајна.
Речиси сѐ што се случуваше на годинашниот Котон блуз фестивал имаше ознака на ексклузивност. Игор Станоски-ИгиМен, „Мол пек“, Александар Пешевски и „Кросроуд блуз бенд“ се претставија со нов авторски материјал, „Рене пее блуз“ и „Џони Кеш проект“ се „производ“ на фестивалот, од кои за вториот ова беше премиера, а странските гости Тони Холидеј, Норман Бикер и Хамилтон Лумис допатуваа во Скопје од САД и Велика Британија за единствени настапи во овој дел од светот. Згора на тоа, свиреа со свои бендови.
И додека Лумис и Холидеј, кој првпат беше на КБФ во 2022, ја покажаа и својата шоуменска страна на сцена, симпатичниот 75-годишен Бикер се задржа на гитарската виртуозност, а споредбите со Ерик Клептон ги преточи и во изведбата на неколку негови хита. Бикер и Лумис ѝ наздравуваа на публиката со ракија, за која кажаа дека првпат ја пробуваат.
Како и на претходните пет изданија, целиот приход од фестивалот, што ги вклучува и делата создавани на тамошната уметничка колонија, ќе биде дониран.
Г. КОНЕВ
Фото: З. Петровски
