Алехандра Мариса Родригез, која има 60 години, си го оствари сонот да стане најстарата натпреварувачка за Мис Универзум во историјата на натпреварот за убавина во Аргентина.
Таа работи како правен советник во болница, а нејзиното влегување во натпреварот беше поздравено како триумф. Родригез не победи на натпреварот, но ја освои титулата „најдобро лице“.
За време на натпреварот, таа им се заблагодари на сите кои го прославија нејзиниот успех на натпреварот за Мис Буенос Аирес минатиот месец. Таа победи на локалниот избор, откако Мис Универзум ја елиминираше својата долгогодишна старосна граница, и предизвика глобалното медиумско внимание.
По изборот за Мис, Родригез им даваше совети за хидратантни креми на жените кои сакаат да имаат мазно лице, нагласувајќи пред јавноста дека има вистина во поговорката дека годините се само бројка.
„Како резултат на она што ми се случи, верувам дека се отвори нова врата за многу луѓе на кои можеби не им беше лесно“, изјави Родригез за АП зад сцената по настанот, сè уште облечена во нејзиниот црвен коктел фустан со шлиц.
За настапот во костими за капење, Родригез избра скромен едноделен костим со шал обвиткан преку рамениците, насмевнувајќи ѝ се на публиката која ја пречека со овации.
Но, судиите ја избраа Магали Бенеџам, 29-годишна актерка и модел од Кордоба, која облече сино бикини и високи потпетици да ја освои наградата „најдобар костим за капење“ и на крајот да ги победи другите 27 натпреварувачки, и со тоа да стане Мис Аргентина. Таа ќе ја претставува Аргентина во Мексико Сити на светскиот избор за Мис Универзум во ноември.
Дури и победата на Бенеџам ќе беше невозможна пред една година, бидејќи изборот долго време ја ограничуваше возраста на натпреварувачките на 28 години. Тоа е најнова во серијата промени за натпревар кој беше мета на феминистичка критика откако протестите со „запалени градници“ го прекинаа натпреварот за Мис Америка во 1968.
Со децении, изборот за Мис Универзум отворено се опишуваше себеси како екстраваганција на немажени жени во доцните тинејџерски и во дваесеттите години. Подоцна, организаторите сфатија колку далеку натпреварот заостанува зад културата.
Во текот на последниве години, додека #MeToo и движењата за социјална правда го зафатија светот, Мис Универзум се обидуваше да ги убеди скептиците дека повеќе се работи за умови отколку за тела. Стана отворен за учество на мажените, бремените, лезбејките и трансродовите жени и ги отстрани сите спомнувања за „убавина“ од својата веб-страница.
