Десеттото издание на фестивалот за европска литература Букстар ќе се одржува од 30 септември до 3 октомври во „Лабораториум“, Филолошкиот факултет „Блаже Конески“, Градскатата библиотека „Браќа Миладиновци“ и Европска куќа во Скопје.
Програмата опфаќа дваесетина настани, како разговори со автори, промоции на книги, средби со студенти, панел-дискусии, книжевни читања, креативни работилници, концерти и изложба. Влезот за сите книжевни настани е бесплатен.
Во рамките на фестивалот ќе биде соопштен добитникот на наградата „Драги“ за најдобар превод на македонски јазик. Петте финалисти се Анастасија Ѓурчинова за преводот од италијански на „Интимен живот“ од Николо Аманити, Ѓоко Здравески за преводот од хрватски на „Тројца за картал“ од Миљенко Јерговиќ, Екатерина Бабамова за преводот од англиски на „Градот на победата“ од Салман Ружди, Елисавета Поповска за преводот од француски на „Девојчински спомени“ од Ани Ерно и Ирена Јурчева за преводот од англиски на „Силмарилион“ од Џ. Р. Р. Толкин.
Годинава за првпат се доделува специјалната награда „Букстар Х10“ за исклучителни достигнувања во литературата, а ќе ја добие Алесандро Барико (фото), италијански романсиер, сценарист, литературен и музички критичар, новинар и есеист.
Вториот годинашен лауреат е Јон Калман Стефансон, кој ќе ја добие традиционалната награда „Букстар“ за трилогијата „Помеѓу рајот и пеколот“. Стефансон (1963) е најзначајниот современ исландски писател.
