Грција ги откри границите на двата планирани национални парка во Јонското и Егејското Море и премиерот Кирјакос Мицотакис изјави дека тие ќе бидат најголемите во медитеранскиот регион.
Атина сака да ги воспостави парковите оваа година заради заштита на морските цицачи и желки во Јонското Море и морските птици и фоки во Егејското Море. Мицотакис рече дека тие ќе ѝ помогнат на земјата да ја исполни својата глобална обврска за проширување на морските заштитени подрачја на 30% од своите води до 2030 година.
„Тие ќе бидат огромни светилишта за живот под брановите. Риболовот по морското дно ќе биде забранет во рамките на зоните“, рече Мицотакис.
Планираниот парк во Егејското Море претходно предизвика тензии помеѓу Грција и соседна Турција, кои се во спор и околу морските граници. Атина изјави дека паркот е целосно во рамките на територијалните води на Грција и првично ќе се прошири околу јужните острови Киклади.
Големината на двата парка се проценува на 27.500 квадратни километри, рекоа владини претставници, а Грција сака дополнително да ги прошири.
