„Јон Вардар против галаксијата“ ја освои наградата за најдобар долгометражен анимиран филм на шестото издание на филмскиот фестивал Galactic Imaginarium во Романија, кој ги спојува филмот, литературата и новите технологии во областа на фантастиката.
Ова е трето фестивалско признание за филмот на Гоце Цветановски, кој претходно беше прогласен за најдобар анимиран филм на фестивалите во Портовјехо во Еквадор и Аријано во Италија.
„Наградата ја посветувам на сите членови на екипата кои неуморно работеа за да го претворат овој филм во реалност и на сите оние кои помогнаа во ова историско остварување за македонската кинематографија“, изјави Цветановски.
Филмот досега се прикажа на триесетина фестивали во Европа, Јужна Америка и Азија, а следниот месец ќе има и австралиска премиера.
Сценариото и режијата се на Гоце Цветановски, арт директор е Михајло Димитриевски-Тхе Мичо, директор на анимација е Димитар Ѓоргиев, продуцент е Алан Кастиљо, а главните улоги ги толкуваат Жарко Димоски, Емилија Мицевска и Дамјан Цветановски.
