Американскиот џез гитарист, композитор и продуцент Курт Розенвинкел со задоволство прифати да свири во Скопје, велат од Националниот џез оркестар пред нивниот прв концерт за оваа сезона, кој ќе се одржи на 1 октомври во Националната опера и балет.
„Курт Розенвинкел првпат доаѓа во Скопје и чест ни е што успеавме да го усогласиме распоредот на овој гитарски гениј. Тој со задоволство прифати да биде гостин на нашиот концерт“, ни рече Гоце Стевковски за гостинот од Америка, за кого Ерик Клептон има кажано дека е гениј.
Концертот е од 20 часот, а ќе диригира Владимир Николов.
„Веќе три децении, Розенвинкел ја обликува современата џез-сцена со своите препознатливи стил и музичка длабочина. Од своите први настапи во Њујорк во 1991, тој се издигна како вистински иноватор, создавајќи албуми кои инспирираат генерации музичари и љубители на џезот ширум светот“, напиша „Њујорк тајмс“ за гитаристот.
Билетите се продаваат преку мрежата на МК тикетс.
М. ЏАРОВСКА
Фото: Т. Дикенсон
