Пионерите на електронската музика „Крафтверк“ се враќаат во Скопје по осум години пауза. Откако претходно одржаа распродадени концерти на Скопски саем и во арената „Борис Трајковски“, овојпат ќе настапат на отворено, во рамките на Скопје колинг.
„Авалон“ објави дека следниот скопски концерт на легендарните Германци е на 25 јули на Стадионот на АРМ во Градски парк и е дел од новата турнеја „Мултимедија“.
„Крафтверк“ е основан во 1969 година и од оригиналната постава во бендот сѐ уште членува Ралф Хитер. Имаат издадено 11 албуми и се сметаат за едни од најголемите иноватори на полето на електронската музика и значително придонесоа за нејзино популаризирање. „Крафтверк“ првпат гостуваше во Скопје во 2005 година.
Картите ќе се продаваат од 28 јануари по цена од 1.990 и 2.990 денари.
Фото: Г. Конев
