ЛУКСУЗНИТЕ БРЕНДОВИ СЕ ВО ТРКА ЗА ПЛАСМАН ВО НОВИОТ ФИЛМ ЗА ЏЕЈМС БОНД

Лондон, (Ројтерс)

Луксузните брендови се натпреваруваат да бидат дел од светот на Џејмс Бонд, откако „Амазон“ на 16 ноември објави дека Роберт Патинсон ќе биде новиот агент 007.

Поминаа повеќе од 60 години откако филмот „Доктор Но“ го претстави агентот 007 пред филмската публика, а Бонд и понатаму останува едно од најпосакуваните маркетиншки средства во светот. Производители на часовници и автомобили, модни куќи и брендови на алкохолни пијалаци трошат милиони околу секој филм, надевајќи се дека ќе бидат поврзани со најпознатиот таен агент.

Изборот на Патинсон (40) стави крај на долгогодишните шпекулации за тоа кој ќе ја преземе улогата, откако во филмот „Не е време за умирање“ од 2021 беше убиен ликот на Џејмс Бонд, кој го играше Даниел Крег. Тој носеше часовници „Омега“, возеше „Астон Мартин“ и носеше костуми од „Том Форд“.

Експертите за брендови сметаат дека првиот филм за Бонд под покровителство на „Амазон МГМ“ и во режија на Денис Вилнев претставува ретка можност за луксузните компании одново да го обликуваат едно од највнимателно следените портфолија на производно позиционирање во Холивуд.

„Џејмс Бонд зазема посебно место кога станува збор за брендирањето“, изјави Ерик Небот, основач и извршен директор на агенцијата за пласман на производи „Хил Вали“.