Специјалната обвинителка Катица Јанева доби 30 дена притвор откако денеска беше уапсена во својот дом во Скопје по налог на шефицата на Обвинителството за организиран криминал и корупција Вилма Рускоска. Таа се сомничи за злоупотреба на службената положба и овластувањата во врска со случајот „Рекет“, во кој претходно се уапсени бизнисмените Бојан Јовановски-Боки 13 и Зоран Милевски-Кичеец.
- Катица Јанева поднесе оставка на својата функција на 15 јули, истиот ден кога на граничниот премин Богородица се уапсени Јовановски и Милевски, обвинети дека тргувале со влијание и убедувале луѓе кои се дел од истражна постапка дека имаат моќ кај јавен обвинител, за што зеле 1,5 милиони евра.
- Истиот ден, на Јанева ѝ беше одземен телефонот за да се утврди евентуална комуникација со Боки 13.
- Во разговорите помеѓу Боки 13 и Орце Камчев, што ги објави италијанскиот весник „Ла Верита“, се слуша и гласот на Јанева и таа потоа кажа дека преку посредник преговарала со Камчев да биде сведок во нова предистрага на нејзиното обвинителство.
- Јанева вчера беше на распит во Обвинителството за организиран криминал и корупција како повикано лице во истрагата „Рекет“.
- По денешното апсење, обвинителката Рускоска изјави дека уште при почнувањето истрага против Јовановски и Милевски имало основани сомневања дека Јанева ги злоупотребила службената положба и овластувањата.
- Државниот обвинител Љубомир Јовески кажа дека Јанева за себе и за други лица прибавила значителна имотна корист за да му ја олесни состојбата на Камчев, осомничен во случајот „Империја“.
- Јанева добила мебел во вредност од 5.000 евра откако средила Камчев да оди во куќен притвор и да му биде вратен пасошот.
- Полицијата го заплени мебелот од домот на Јанева, како и нејзиниот компјутер од канцеларијата во СЈО.
- На барање на Рускоска, Јанева вечерва доби 30 дена притвор како третоосомничена во случајот „Рекет“ и веднаш од Кривичниот суд беше испратена во истражниот затвор во Шутка.
