Древни камени алатки пронајдени во западна Украина можеби се најстариот познат доказ за присуство на луѓето во Европа, вели истражување објавено во магазинот „Нејчр“.
Исечените камења направени од вулканска карпа биле ископани од каменолом во Королево во 1970-тите. Археолозите користеле нови методи за да ги датираат слоевите на седиментни карпи кои ги опкружуваат алатките, утврдувајќи дека се стари повеќе од еден милион години.
„Ова е најраниот датиран доказ за кој било тип на луѓе во Европа“, изјави Мадс Фауршоу Кнудсен, геофизичар од Универзитетот во Архус и коавтор на студијата.
Тој рече дека не е сигурно кои рани човечки предци ги создале алатките, но можеби бил хомо еректус, првиот вид кој одел исправено и го совладал користењето на оган.
„Немаме фосилни остатоци, така што не можеме да бидеме сигурни. Исечените камени алатки веројатно се користеле за сечење месо и можеби за отстранување животински кожи“, рече Роман Гарба, археолог од Чешката академија на науките.
Некои истражувачи веруваат дека алатките би можеле да бидат стари 1,4 милиони години, додека други ја проценуваат нивната старост на над еден милион години, колку што се стари и древни алатки пронајдени во Шпанија.
(Фото: АП)
