Околу 600 автори од над 80 држави учествуваат со 800 дела на второто Меѓународно биенале на минијатурна уметност (МБМБ) во Битола, кое се отвори синоќа (12 август) во Културно-информативниот центар – Офицерски дом.
Биеналето е организирано и реализирано од неговиот раководител Владо Ѓорески, кустос и графичар, кој е и раководител на Меѓународното графичко триенале во Битола.
После Битола, биеналето ќе биде презентирано во Грција, Србија и Романија, а во преговори е и со Полска затоа што учествуваат и над 100 полски автори.
„Очигледен е растечкиот интерес од уметниците ширум светот, што потврдува дека Биеналето и Битола стекнуваат афирмација и респект. Концептот на Биеналето – мал формат е намерно избран, бидејќи им овозможува на уметниците да се изразат чисто, неоптоварено, импулсивно и слободно“, рече на отворањето галеристот Драган Ристевски.
На отворањето, постхумно беше доделена специјална награда на битолскиот ликовен уметник Ранко Струмениковски за неговиот придонес во развојот на современата ликовна уметност и графика во Македонија. Наградата ја прими неговата ќерка Тања Струмениковска-Ристевска. Специјална награда доби и Гоце Божурски за истакнати креативни изразувања, особено во минијатурната уметност, реализирано и преку неговиот циклус од 1.000 графички дела „Илјада и една љубовна приказна“.
