Во скопскиот Драмски театар се одржа првата проба на претставата „Куршуми над Бродвеј“, чија премиера ќе биде во втората половина на октомври.
Ова е второ гостување на режисерот Ненад Витанов во Драмски театар. Тој на првата проба рече дека „Куршуми над Бродвеј е негова драматуршка обработка и адаптација на познатиот истоимен филм, напишан од Вуди Ален и Даглас Мекграт. Филмот беше номиниран за седум оскари, меѓу кои и за најдобро сценарио.
Во претставата, главен лик е Давид, млад драмски писател кој очајно се обидува да најде театар кој ќе ја продуцира неговата најнова драма.
Витанов е режисер и драматург и ја направи адаптацијата на претставата, костимите се на Елена Вангеловска, сценограф е Филип Витанов, а кореографка Маја Каревски. Играат Игор Стојчевски, Сашо Тасевски, Јелена Жугиќ, Александар Степанулески, Јована Спасиќ, Александра Павлова-Бубања, Предраг Павловски, Калина Наумовска, Роберт Вељановски, Златко Митревски, Ања Митиќ, Дениз Абдула и двајца студенти по актерска игра.
