Испитите често се поврзуваат со притисок, долги будни ноќи и очајна потрага по удобно место за учење. Мал остров покрај брегот на Данска, на околу 30 минути возење со брод од Копенхаген, нуди можност да се избегне тоа.
Унгдомсен или Остров на младоста е поранешна поморска тврдина, која е домаќин на студенти кои сакаат да се концентрираат на своето учење и бараат мир.
Мина Кјелдсен, раководителка на проектот, вели дека целта е да се понуди достапно место за широк спектар на студенти каде што ќе можат да се фокусираат и да си помагаат едни на други со студиите и подготовките за испитите. Иницијативата собира од 20 до 40 студенти истовремено за неколку дена заеднички живот, академска работа и структуриран одмор.
Учесниците пристигнуваат со брод и се охрабруваат целосно да се исклучат од градскиот живот. Вештачкиот остров од 70.000 квадратни метри нуди свеж воздух, отворен простор и тивок ритам, што е во остра спротивност со темпото на студентскиот живот на копното.
„Секогаш сум слушал поплаки за наоѓање нови места за учење во Копенхаген. Се заморувате од едно кафуле затоа што е премногу гужва, па одите во друго, а не сакате да бидете во вашето училиште затоа што сте таму секој ден. Овдека нема бучава, има само сонце, сино небо и убави места за учење“, изјави Рем Расмусен, еден од домаќините и волонтер на Унгдомсен.
Експертите велат дека изолацијата на островот го зајакнува процесот на учење и пишување.
„Како истражувачи знаеме дека фокусот е навистина важен. Тука не можете туку-така да си заминете. Бродот тргнува дури утре. Затоа сте принудени да останете во рамките на вашиот процес. Кога ќе заглавите, правите пауза и потоа продолжувате напред“, кажа Марија Дуклос Линдстром од Универзитетот Роскилде.
Повлекувањето го балансира интензивниот академски фокус со моменти на релаксација и дружење. Студентите ги поминуваат вечерите во заедничко готвење и јадење, а понекогаш се опуштаат во сауна покрај морето или пливајќи. Идејата е да се доведат студентите во контакт не само со нивната работа, туку и едни со други.
