Првиот македонски долгометражен анимиран филм „Јон Вардар против галаксијата“ ќе учествува на еден од водечките фестивали за независен филм во светот BAFICI во Буенос Аирес, Аргентина. Филмот ќе се прикаже трипати пред фестивалската публика, на 8, 10 и 11 април.
„Анимиран долгометражен филм од Македонија не е нешто што се гледа секој ден, но шармот на ‘Јон Вардар‘ е далеку од тоа да е само географски куриозитет. Оваа визуелна лудорија со своите интергалактички авантури што наликуваат на халуцинација, откачени вонземјани и хумор со висока концентрација се истакнува со рокерска дрскост и заразна комичност“, напиша Мануел Рамирес, познатиот аргентински филмски критичар, за дневниот весник „Пагина 12“.
Режисерот Гоце Цветановски рече дека многу го почитува фестивалот поради неговата храброст да прикаже филмови што излегуваат од шаблоните.
„За нас оваа селекција е како да сме испратиле балкански вселенски брод во срцето на Буенос Аирес. Горди сме што ‘Јон Вардар’ ќе има можност да се сретне со една отворена и љубопитна публика, каква што е аргентинската“, вели Цветановски.
Филмот е копродукција помеѓу Македонија, Унгарија, Бугарија и Хрватска и е поддржан од Агенцијата за филм. Светската премиера ја имаше во октомври на 57. издание на Фантастик филм фестивал во шпанскиот град Ситџес, а набргу потоа беше и домашната на фестивалот Киненова.
