Осум бендови ќе настапат на годинашниот Лузер фест, избрани по отворениот конкурс за демо изведувачи, што „Пасворд продукција“ традиционално го распишува пред фестивалот Таксират. Тие ќе се натпреваруваат на 3 декември во Младински културен центар во Скопје, а наградата за победникот е снимање албум во професионално студио, што потоа ќе биде објавен под етикетата на „Пасворд“.
Три финалисти се од Скопје, „Растстејнд“, „Мензел“ и „Харакири“, а останатите се „Беседа“ од Куманово, „Халфгад“ од Кичево, „Ендемски вид“ од Кавадарци, „Оловна рестрикција“ од Велес и „Џеф Бахами“ од Битола.
Победникот ќе го изберат жирито и публиката со тајно гласање.
