Кирил Џајковски ќе одбележи 25 години правење филмска музика на утрешниот (15 јуни) концерт во Националната опера и балет, на кој ќе се изведе музиката што ја напиша за бројни домашни и странски филмови.
Тој ќе настапи во придружба на оркестар, со кој ќе диригира Џијан Емин и музичарите Владимир Крстев, Ратко Даутовски, Антоние Весковски, Андреј Трајковски и Игор Иванов. На репертоарот ќе бидат композиции од филмовите „Големата вода“, кој доби награда за најдобра филмска музика на фестивалот во Валенсија, „Прашина“, „Сенки“, „Балканот не е мртов“, „Врба“, „Бал-кан-кан“, „Трето полувреме“ и многу други.
Џајковски (1965) е еден од најзначајните современи македонски музичари. Кариерата ја почна во култната рок група „Бастион“, соработуваше и со „Леб и сол“, а денес најмногу се занимава со електронската музика. Тој исто така често пишува музика за филм и театар.
Организаторот „Пасворд“ објави дека концертот е распродаден.
(Фото: Фејсбук)
