Романтичен концерт со свеќи на сцената одржа камерниот оркестар „Профундис“ вчера (29 ноември) во Филхармонијата со познатиот српски виолончелист Петар Пејчиќ како солист. Диригираше маестра Ѓурѓица Дашиќ, а концертот го организираше Охридско лето како дел од придружната програма.
„Профундис“ го следи светскиот тренд, одржувајќи концерти со илјадници (вештачки) свеќи на сцената, прво во Скопје, па потоа низ Македонија, а летово имаше успешна турнеја низ Босна и Херцеговина. Концертот беше насловен „Безвременски“ (Timeless) и беше несекојдневно музичко и визуелно уживање со врвна изведба на музичарите.
„Профундис“ е оркестар основан во 2019 и оттогаш имаше успешни настапи на фестивали во Црна Гора, Србија, Бугарија и Италија.
Петар Пејчиќ е млад и исклучително талентиран виолончелист кој со години го привлекува светското внимание со своите виртуозност, музикалност, техника, сценски изглед и харизматична изведба. Награден е на неколку престижни меѓународни натпреварувања, вклучувајќи го Вториот меѓународен натпревар на Кралицата Елизабета.
Тоа го докажа и со изведбата во Скопје. Пејчиќ совршено звучеше заедно со оркестарот, а публиката сосема заслужено ги награди со силни аплаузи и беше на нозе на крајот од концертот.
М. ЏАРОВСКА
