Фотографиите од хотели и лажните критики генерирани со вештачка интелигенција се тестираат повеќе од кога било кога се бара сместување преку интернет. Таквите измами на „Ербиенби“ можат да го уништат одморот.
Новинарката Натали Комптон од „Вашингтон пост“ го сподели своето лошо искуство со „лажното сместување“ што го нашла во Париз.
„Париз, 2018. Најдов стан на ‘Ербиенби‘ за нешто помалку од 60 долари за ноќ. Поминав низ онлајн огласот заслепена од цената, големите прозорци, машината за перење и локацијата. Го резервирав за седум ноќи. Кога стасав на адресата, бев во шок. Влегов во тесен темен стан, и покрај сончевото попладне надвор. Станот беше на стрмен рид, така што и низ големите прозорци не доаѓаше многу светлина. Но, уште поважно, немаше кревет. При моето избрзано испитување на огласот не забележав дека има само слика од софа. По една недела, научив дека единственото нешто што на мојот грб повеќе му пречи од европскиот душек е европскиот кауч на извлекување“, вели Комптон.
Таа доживеала вакво искуство и при посетата на Бејрут.
„Резервирав прекрасен стар стан во забавен дел на Бејрут, блиску до ресторани, продавници, барови, но можеби малку преблиску до барови. Беа веднаш долу. Дури и да останевме надвор до доцна, баровите беа отворени до многу подоцна. Музиката влегуваше низ ѕидовите, тресејќи го мебелот од нашиот стан на третиот кат. Благодарност за чепчињата за уши“, вели новинарката за сместувањето во Бејрут.
Во Ханој во Виетнам платила 30 долари за хотелска соба без прозорец.
„Го пробав животот без прозорец неколкупати, при евтини престои во хостели во Бангкок и Малезија, а еден петдневен одмор без прозорец во Лисабон за малку ќе ме полудеше. Што се случи овојпат? Излезе дека во огласот има фотографии од повеќе типови соби, една со прозорец и очигледно една без“, вели Комптон.
