Со хитот „Принцеза“ кој го испеа во дует со хрватскиот рокер Дадо Топиќ, фестивалот Охрид фест- Охридски трубадури се сети на српската аванградна уметница и пејачка Слаѓана Милошевиќ, која почина во март во 2024 во Белград.
Во чест на Милошевиќ, водителката на фестивалот Марјана Станојковска испеа дел од песната, и со неа го најави гостинот Дадо Топиќ. Хрватскиот рокер со песната „Македонија“ го затвори фестивалот кој го по 32. пат се одржа сношти (30 август) на сцената на „Долни Сарај“. Заедно со него, хитот кој Топиќ го сними во јуни во 1973 со групата „Тајм“, го испејаа сите учесници на фестивалот.
Со песната „Принцеза“, Дадо Топиќ и Слаѓана Милошевиќ се натпреваруваа на тогашниот југословенски избор за Песна на Евровизија во 1984 во Унииверзалната сала во Скопје. Тогаш победи дуетот Владо Калембер и Изолда Баруџија. Слаѓана Милошевиќ подоцна изјави дека на неа и на Дадо Топиќ им е нанесена неправда поради политичкото гласање на жирито. „Ние добивме најголем аплауз од публиката во Скопје“, рече пејачката.
Победник на „Охрид фест“ од гласовите на публиката е срспскиот пејач со македонско потекло Ангело. Второто место го освои Ивона Јо, а третото дуетот Дорис Димовска и Наум Бумбаровски. Дуото „Броз и марама“ го освоија првото место од жирито, второто Наталија Данаилова, а третото Саша Лазаревиќ- Кудра од Србија. Блаж Маротов ја освои наградата од новинарите.
„Драго ми е што и покрај големото невреме во Охрид успеавме успешно да го одржиме фестивалот. Почнавме порано поради најавениот дожд, а целиот тим и сите учесници професионално си го одработија ангжамнот“, рече директорот на фестивалот Григор Копров.
М. ЏАРОВСКА
