Од 14 до 20 мај, во Скопје ќе се одржи шестото издание на Фестивалот ЈЕС, во организација на издавачката куќа „Чудна шума“. Ќе има програма со книжевни вечери, промоции, читања, креативни работилници за деца и млади и изложби.
Годинава фестивалот ќе трае седум дена и ќе се одвива на седум различни локации: кафе-книжарницата и галерија „Чудна шума“, кафе „Долап“, МКЦ, креативното студио „Умна куќа“ и објеките на Градската библиотека „Браќа Миладиновци“.
Програмата е поделена на два сегмента: книжевни вечери и промоции, како и специјална програма за деца со читачки и креативни работилници.
Фестивалот ќе биде отворен со книжевната вечер „YES за кратка проза“ во галеријата „Чудна шума“, каде свои дела ќе читаат Иван Шопов, Владимир Лукаш, Долорес Атанасова-Лори, Биљана Стојановска, Хана Корнети, Ѓоко Здравески, Драгана Лукан-Николоски, Живко Грозданоски, Филип Димевски, Билјана Црвенковска и Ненад Јолдески.
Покрај гостите од Белгија, Албанија, Словенија и Хрватска, на фестивалот ќе учествуваат и 12 македонски автори, а ќе биде организирана и групна изложба на домашни уметници.
