Промовирана е песната „Идната јас“, со која Ана Стојаноска ќе ја претставува Македонија на Детската Евровизија на 24 октомври во Малта. Автор на музиката е Никола Мицевски, а текстот го напиша Илчо Нечовски од групата „Дупер“. Продукцијата е на студиото „Икс-ел“ на Момировски.
Мицевски вели дека за него е голема чест што ја напишал песната со која Стојаноска ќе настапи на евровизиската сцена.
„За мене е огромна чест и задоволство што имав можност да ја направам оваа песна. Благодарам на Илчо од ‘Дупер’, за прекрасниот оригинален текст кој го направи. Благодарам на Македонската радио-телевизија за довербата и на целиот тим на чело со Дијана Гогова. Сигурен сум дека ќе се претставиме во најдобро светло во Малта и дека оваа песна ќе се слуша далеку низ Европа и светот“, рече Мицевски.
Ана Стојаноска е млада пејачка од Струга. За македонска претставничка на Детската Евровизија беше избрана на аудиција, при што жирито едногласно ги препозна нејзините вокални способности, сценски настап и уметнички потенцијал.
