Театарскиот перформанс „По патеката на лилјани“, во режија на актерката Елизабета Клинчаревска-Младеновска, се изведе во Музејот на современата уметност во Скопје. Преку театар, мода и музика беа претставени санџачката свадбена традиција и животот на жената низ различни времиња.
Во центарот на приказната е симболичната средба на две невести, една од минатото и една од сегашноста. Современата невеста ја игра Клинчаревска Младеновска, а невестата од минатото Албина Бачевац. Низ нивната средба се прикажани женските надежи, стравови и очекувања при заминувањето од родниот дом и започнувањето нов живот.
Во перформансот учествуваа и Белма Хасиќ, Дамир Бачевац, Сана Гиќиќ, Фуад Сејдовиќ, Раиф Тахировиќ и други. Продуцентка е Аниса Бечировиќ, а модните креации се дело на дизајнерката Санела Дошљак-Цатовиќ од Црна Гора. Музиката ја избраа Дамир Бачевац и Белма Хасиќ.
