И „СЕАТ“ ИМА СВОЕ МАЛО УРБАНО ЕЛЕКТРИЧНО ВОЗИЛО

Барселона, (Топ гир)

„Сеат“ зеде учество на Светскиот конгрес за мобилни технологии во Барселона, но не за да претстави смартфон или таблет, туку концептно возило. „Минимо“, електрично возило во стилот на „рено твици“, е нешто на половина пат меѓу мотоцикл и автомобил и е наменет за градско возење.

„Дизајнот на ‘минимо‘ го покажува начинот на кој ние ја разбираме урбаната мобилност: ефикасно, висококвалитетно и штедливо, во комбинација со динамичен изглед. Нашиот ‘минимо‘ покажува дека и електричните автомобили можат да бидат забавни и со стил“, изјави директорот на дизајн во „Сеат“, Алехандро Месонеро.

Долг 2,5 метри и широк 1,24 метри, „минимо“ е двосед, погоден за паркирање на помали простори. Со едно полнење на батериите можат да се поминат 100 километри.

По дебито во Барселона, најавено е дека „минимо“ ќе се појави и во Женева, а, според шефовите на „Сеат“, производството ќе почне во 2021.