Проектoт Денови на претстави од независната продукција ќе се одржи од 11 до 20 септември во Драмски театар. Ќе го отвори претставата „Слугинки“ во режија на Теодора Силјаноска. Во претставата играат Марија Кондовска, Кристина Гиева и Ванеса Тримчевска.
„Македонски центар ИТИ/ПРОДУКЦИЈА“ ќе настапи со претставата „Криег“ на 12 септември. Режијата е на Иванка Апостолова-Баскар, а играат Здравко Стојмиров и Филарета Атанасова.
На 13 септември е претставата „Folie a Deux“ на режисерот Ѓорѓи Ризески, во продукција на „Вортекс театар“. Во претставата играат Јана Вељановска и Никола Милошевски.
Претставата „Лекција“, работена по делото на Ежен Јонеско, во режија на Ризески, ќе се игра на 16 септември. Во претставата на „Моушн нетворк Штип“ играат Ефтим Трајчов Ѓаурски, Димитрина Мицкоска-Трајкоска, Милорад Ангелов.
На 17 септември, Драмски театар ќе ги отвори двете сцени за проектите на уметниците од независната сцена. На Малата сцена ќе се игра претставата „Те чекам“ на „Театар за тебе“. Автор и режисер е Изабела Јакимова, а играат Гоце Андонов и Ангела Лефкова со учество на публиката. „Волкот на љубовта“ на авторите Бранислав Николов и Тихомир Јанчовски ќе биде вториот настан на сцената „Ристо Стефановски“.
На 18 септември ќе се игра монодрамата „Фетишист“ по делото на Мишел Турне, а режисер е Здравко Стојмиров.
Продукцијата „Театар Златен Елец“ на 19 септември ќе ја игра претставата „Хинкеман“. Режијата и адаптацијата се на Тамара Стојаноска, а играат Бобан Алексоски, Талија Настова/Надица Петрова, Дритон Вејсели/Филип Христовски, Ане Блажовски, Леонида Гулевска и Бранко Михајлоски.
Деновите на независната продукција се затвораат на 20 септември со претставата „Вај-Фај“ (фото), во режија на Мирко Видоески. Играат Наташа Петровска, Лазар Саровски, Драгана Радованов, Глигорије Стојановски и Игор Бачоски. Претставата е во продукција на „Драмско студио Тетово“.
