„Као какао“ е првиот македонски мјузикл инспириран од музиката на Влатко Стефановски, а премиерно ќе биде изведен во мај, во продукција на „Баги комуникации“, со Македонскиот народен театар како копродуцент.
Текстот за мјузиклот го напиша Венко Андоновски, а режисер е Дејан Пројковски. Претставата треба да вклучи 19 композиции од Стефановски, кои ќе бидат изведени во нови аранжмани, специјално подготвени од Бобан Мирковски.
Извршниот продуцент Владимир Мандичевски-Манде вели дека идејата за проектот постоела три години, а конкретните активности започнале во јуни.
„Логично беше да се направи мјузикл според музиката на Влатко Стефановски затоа што станува збор за најиздржаниот и најпризнат опус во современата македонска музика. Соодветно на квалитетот на неговата музика и тежината на неговото име, се обидовме да формираме тим кој со својата работа ќе одговори на тоа дело“, рече Мандичевски.
Главните ликови Дона и Џими ќе ги толкуваат младите актери Катерина Јовановиќ и Владимир Петровиќ, кореографијата е на Олга Панго, костимите на Марија Пупучевска, сценографијата на Валентин Светозарев, а вокална менторка е Ана Костадиновска.
„Текстот на Венко ме насмеа трипати, а ме расплака двапати. За мене, тоа е најдобрата потврда дека е навистина добар. Не се сомневам во режисерските квалитети на Пројковски, ниту во младите актери и верувам дека ова ќе биде интересен и успешен проект“, рече Стефановски.
Режисерот Пројковски нагласи дека проектот претставува голем предизвик, но и голема чест.
„Тргнавме храбро, со желба да создадеме оригинален, автентичен македонски мјузикл. Ќе ги почитуваме формите на жанрот, но ќе се обидеме да изградиме сопствени јазик и идентитет“, кажа Пројковски.
(Фото: Баги комуникации)
