Тијана Дапчевиќ со стендап шоуто „Менопауза“ ќе одржи турнеја низ Македонија, објави продукцијата „Евентум“. Првото шоу на 19 април во Филхармонијата во Скопје е распродадено, и закажано е второ на 21 април.
На 22 април, музичарката и актерка гостува во Кавадарци, на 23 во Битола за отварање на Фестивалот на монодрама, на 24 во Охрид, а на 25 април во Струмица. Сите настани се во центрите за култура.
Македонската музичарка и актерка, која долги години живее во Белград, вели дека претставата е гласна, искрена и духовита приказна за темите за кои жените најчесто шепотат, а сега конечно се зборуваат без срам и со многу смеа. Текстот е на Данило Вукотиќ, а режисер е Раде Вукотиќ.
„Играм драматичен стендап напишан од Данило Вукотиќ. Мојот лик се вика Марина Станковиќ, која е во менопауза. Препознавам многу од ситуациите споменати во текстот кои се случуваат и кај мене, тие промени на расположението, на пример. Драго ми е што можам гласно да зборувам за менопаузата, бидејќи тоа не е табу тема, тоа е нешто што секоја жена го доживува во средните години. Треба гласно да зборуваме дека менопаузата не е крај на животот, таа е само ресетирање“, вели Тијана Дапчевиќ.
