Кога размислуваме за овошје, многумина автоматски го поврзуваат со здрава опција за ужина или десерт. И навистина, овошјето е богато со витамини, влакна и антиоксиданси, но треба да се знае дека не сите овошја имаат ист ефект врз нивото на шеќер во крвта.
„Левелс Хелт“ состави листа на овошја што можете да ги јадете за да го одржите нивото на гликоза во крвта стабилно, како и овошје кое треба да се ограничи или избегнува доколку имате проблеми со шеќерот.
Малините содржат само 2,7 грама шеќер на половина чаша, како и четири грама влакна. Имаат низок гликемиски индекс од 32 и се покажало дека се корисни за намалувањето на скоковите на гликоза после оброк и ја подобруваат чувствителноста на инсулин.
Портокалот содржи умерено количество шеќер (12 грама во еден среден портокал) и 2,8 грама влакна. Портокалите исто така содржат флавоноидни соединенија кои го поддржуваат метаболизмот на гликозата и липидите и го намалуваат воспалението.
Иако јаболката содржат повеќе шеќер, нивните влакна (4,4 грама) помагаат во балансирањето на шеќерот во крвта. Кората содржи и корисни полифеноли.
Кивито е овошје со релативно низок шеќер (6,7 грама во едно киви) и има 2,3 грама влакна. Исто така, богато е со антиоксиданси и со витамините Ц и Е.
Бананите спаѓаат во оние овошја кои се најлоши за регулирање на шеќерот во крвта. Средно голема банана содржи 14,4 грама шеќер и 3,1 грам влакна. Како што созреваат бананите, нивниот шеќер се зголемува.
Грозјето содржи 23,4 грама шеќер по чаша со само 1,4 грама влакна и треба да се избегнува во поголеми количини. Една шолја манго содржи дури 22,6 грама шеќер и 2,6 грама влакна, а една чаша ананас има 16,3 грама шеќер и 2,3 грама влакна.
(Фото: Фрипик)
