Првиот македонски долгометражен анимиран филм „Јон Вардар против галаксијата“ доби признание во Кина, почесна награда за визуелна имагинација на филмскиот фестивал „Блу планет Скај фај“. Наградата ја доделува организацискиот комитет на фестивалот и претставува признание за исклучителен визуелен концепт и иновативен пристап во градењето на изгледот на филмот.
Посебен придонес за визуелниот идентитет на филмот има уметничкиот директор Михајло Димитриевски-Тхе Мичо, еден од најпрепознатливите македонски илустратори. Режисерот и сценарист на филмот Гоце Цветановски рече дека визуелниот пристап бил клучен уште од најраната фаза на развојот на проектот:
„Во овој филм свесно експериментиравме со различни анимациски техники. Нашата цел беше да ги приближиме 2-Д и 3-Д технологијата и да создадеме свет во кој коегзистираат повеќе визуелни естетики. Користењето на различни стилови беше планирано уште при самото пишување на сценариото, како дел од карактеризацијата на световите и ликовите“, рече Цветановски.
Ова е седма меѓународна награда за „Јон Вардар против галаксијата“, кој досега беше прикажан на преку 40 фестивали на сите континенти.
