Четиринаесеттото издание на филмскиот фестивал „Воч аут“ (Watch Out) во Тетово се фокусира на влијанието на уметноста и на улогата на филмот во обликувањето на перспективи и поттикнувањето на промени.
За годинашното издание се пријавиле 892 филмови од 92 земји од сите шест континенти. Стручното жири кое го сочинуваат Синоличка Трпкова – актерка и универзитетска професорка, Марио Е. – новинар и фотограф од Германија и Висар Круша – сценарист и продуцент од Косово избра 30 филмови кои ќе бидат прикажани од 18 до 21 јуни на отворен простор во амфитеатарот на Музејот на комунистичката партија на Македонија.
Стручното жири додели и награди во три категории. За краток филм награден е „Човекот кој не можеше да молчи“ (фото) од хрватскиот автор Небојша Слијепчевиќ, кој лани освои Златна палма на Канскиот фестивал и беше номиниран за Оскар. Во категоријата експериментален и анимиран филм награден е филмот „Сок од портокал“ на Александар Атане од Франција, додека во категоријата документарен филм наградата ја доби „Заробена жена“ од Шпанецот Итаксо Дијаз.
Во рамките на фестивалот ќе се одржат и работилници и концерт.
З. АНДОНОВ
