Ана Петановска (фото) ќе биде единствената пејачка од Македонија која ќе настапи на двата Василичарски концерта во Операта на 12 и на 13 јануари од 20 часот. Годинава, по неколкуте концерти со оперски арии изминативе години, ќе се пеат светски диско хитови.
Концертите се насловени „Диско вечер“, а како солисти, заедно со оркестарот на Националната опера и балет ќе настапат Џудит Беноа од Велика Британија, Даниел Ситрит од Данска, Клара Лукас од Германија и Мартин Лин од Данска.
Диригент е Емин Џијан, режисер Дејан Прошев, а сценографијата и видеодизајнот се на Марија Ветероска. На репертоарот се сплет песни од „Бони Ем“, хитови од Дона Самер, „АББА“, Глориа Гејнор и многу други.
Ќе се испеат и неколку дуети, а како придружни вокали настапуваат Анита Русевска, Марија Наумовска, Мила Николовска, Маја Блажевска и Денис Димоски.
Ова ќе биде 31. издание на Василичарскиот концерт кој минатата година прослави јубилеј со настап на оперските пејачи од Шпанија Ирене Палазон (сопран) и Хозе Луис Сола (тенор). Диригираше Оливер Диаз од Шпанија.
