КОНЦЕРТОТ СО БИГ БЕНДОТ НА МАКЕДОНСКИТЕ ЏЕЗЕРИ Е ГОЛЕМО ПРИЗНАНИЕ ЗА МЕНЕ, ВЕЛИ РАМБО АМАДЕУС

Скопје, (СМАРТ СДК.МК)

Дел од богатиот творечки опус на Рамбо Амадеус ќе може да се чуе во едно сосема ново издание на концертот во Филхармонијата в четврток, кога една од најголемите регионални музички ѕвезди ќе настапи заедно со Биг бендот на Здружението на џез музичари. Распродадениот концерт насловен „Чудо на Балкан“ е прв проект од ваков вид на Биг бендот.

Музиката е еден неограничен простор. Мило ми е што мојата музика добива некои нови агрегатни состојби, претходно имам работено малку и со еден гудачки оркестар од Нови Сад. Многу ми е возбудливо кога ќе видам како некои мои песни добиваат еден нов живот, тоа е некое признание за мене. Среќен сум што воопшто имам можност да ја чујам мојата музика на еден нов начин и дека тоа не е само шоу-бизнис или естрада, туку дека постојат уметници кои го ценат она што сум го направил“, кажа црногорскиот музичар, кој неколку дена е во Скопје заради пробите пред концертот.

Џијан Емин е еден од креаторите на новите аранжмани за познатите песни на Рамбо.

Ова е фантастичен момент за мене и за сите нас, се надевам и за публиката. Избравме 15-ина композиции од богатиот опус на Рамбо, од најраната творечка фаза, како ‘Халид Инвалид Хари‘, до денес, што ќе ги отсвириме во еден нов аранжман, со нов дух и нов шарм“, кажа Емин.

Рамбо Амадеус призна дека ќе му биде необично да свири со 20-ина музичари на сцената.

Ова е нивно шоу, јас сум само гостин и ќе се трудам да не им пречам со мојот егоизам. Тие имаат што да покажат“, додаде Рамбо.

Г. КОНЕВ