Новото издание на меѓународниот фестивал „Песните на Тоше“ ќе се одржува од 15 до 19 октомври во Скопје, најави организаторот Марјан Катароски од Прилеп.
„Овој настан ги слави безвременската музика и хуманоста на Тоше. И годинава очекуваме млади пејачи од цела Европа кои ќе ги пеат неговите песни. Желба ни е да продолжат да живеат песните на Тоше Проески и да ги пеат и новите генерации. Ќе се пеат на јазикот на кој се снимени“, вели Катароски.
На ланскиот фестивал победи фаворитот на многумина, Нела Манчевска (фото), а за најдобрите гласаа членовите на бендот на Тоше. Најголем впечаток остави Софија Климентева од Украина, дете со оштетен вид, која ја испеа песната „Соба за тага“.
Впечатлив настап имаше и Емина Бајтаревиќ од Босна и Херцеговина, која има посебна техника на пеење, од стомак. Таа настапува со кукла и пее уште еден вокал во песната што го претставува како да е на куклата.
М. ЏАРОВСКА
Фото: К. Попов
