Групата „Меморија“ издаде троен албум во живо, снимка од концертот кој се одржа во ноември во арената „Борис Трајковски“. Албумот е во двоен формат, плоча и цеде.
„Кога е плочата во прашање, се работи за вистински уникат каков што во Македонија досега не е објавен. Албумот ‘Меморија 2024 во живо’ е сместен на три плочи и има 21 песна поради просторот, а на двојното цеде се 25 песни од целиот концерт и на него се вклучени и песните изведени од специјалните гости на концертот“, велат од „Меморија“.
Музички продуценти на албумот се Мите Димовски и Давор Јордановски, а тон мајстор е Евгениј Каревски. Извршни продуценти се Бошко Мангаровски и Христина Георгиевска, која е авторка на графичкото решение.
Албумот е произведен во „ДДАЦ Сони“ во Австрија, во издание на „КЛС продукција“. Печатен е во лимитиран број на примероци и речиси целиот тираж е веќе распродаден.
„Меморија“ доби награда за најдобра рок група на манифестацијата „Златна бубамара на популарноста“, а концертот беше награден за рок концерт на годината. На концертот и на настапот на „Златна бубамара“ гостуваше Филип Николовски од Прилеп, лице со посебни потреби, кој е гостин во песната „Само на добро нека е“. „Меморија“ му ги посвети наградите на него.
Фото: Ѓ. Личовски
