„Сонценце“ е новата песна на „Нокаут“, за која е направен интересен анимиран видеоспот, што го изработи и режираше Никола Перевски-Пере, фронтменот на бендот.
Перевски е автор на музиката за песната, аранжманот го работеше заедно со Дарко Димитров, а текстот е на Игор Џамбазов, кој го напиша и текстот за хитот „Во бестрага“ и за други песни на „Нокаут“.
„Со огромно задоволство ви го претставуваме нашиот нов сингл ‘Сонценце’. Дури и кога е студено, секој од нас заслужува свое сонце. И периодов уживајте во малку повеќе витамин Д“, велат од „Нокаут“.
Песната е снимена во студиото „Димитрови“, а ја свират членовите на „Нокаут“, Горан Кавраков на саксофон, Горјан Петровски на гитара, Борче Кузмановски на клавијатури, Виктор Николовски на бас гитара и Благоја Антовски на тапани.
