Сараевскиот бенд „Црвена јабука“ ќе прослави 40 години кариера со концерт во Скопје на 29 ноември во салата „Борис Трајковски“ од 21 часот. Фронтменот Дражен Жериќ-Жера на прес-конференција во Скопје рече дека му е драго што во концертите еднакво ужива и помлада и повозрасна публика.
„Без оглед на овие нови трендови, тинејџерите се исти и во 1980-тите и во 2025. Јас сум старомоден човек кој верува во емоциите кои луѓето ги доживуваат на концертите. Првиот бакнеж на некоја од нашите песни е прв бакнеж и во 1986 и во 2025. Спомените кои ги имаат луѓето на нешто убаво што се случило додека ги слушаат нашите песни е ист и тогаш и сега“, рече Жериќ.
Во јуни, „Црвена јабука“ одржа концерт во салата „Олимпија“ во Париз.
„Тој концерт помина одлично, имаше и Французи кои не знаеја ништо за нашата музика и општо многу малку за Балканот. Но, еднакво се забавуваа како нашите луѓе таму“, рече Жериќ и додаде:
„Македонскиот народ го засакав кога имав 18 години затоа што е сличен со нас Босанците. Имате широко срце, сакате скара и чорба исто како мене. Јас не сум љубител на овие нови, фенси јадења“.
Жериќ се присети и на неговиот пријател Халид Бешлиќ, кој почина неодамна.
„Тажно и болно е што Халид веќе го нема. Тој беше добар за сите други освен за него, исто како Кемал Монтено. Тоа беа единствени луѓе, со широко срце и душа, какви што денес се ретки“.
Жериќ денес живее во Загреб со сопругата и ќерките, но со радост се враќа во родното Сараево, за кое рече дека за него е исто кога и да го посети. Драго му е што во Сараево имал од кого да учи. Ги спомена Здравко Чолиќ, „Бијело дугме“ и Даворин Поповиќ од „Индекси“, чии совети и денес ги памети.
„Кога работиме концерти на групи кои слават јубилеј, кои се основани уште пред да се родам, тие секако се едни од нашите најважни и посебни“, рече менаџерот Кристијан Стефановски од продукцијата „Прагма“.
М. ЏАРОВСКА
Фото: К. Попов
